mercoledì 4 aprile 2018

DATIMI ACCURDATA NA CHITARRA. Testo di una nuova canzone (voleva essere rap).



DATIMI NA CHITARRA
Luna tu

Testo e musica di ©Piero Carbone


Luna luna luna tu
Suli suli suli tu. (2 volte)
Vientu vientu hiuhia tu
Hiuhia, un ci pinsari cchiù (2 volte)

Frase musicale

I
E datimi accurdata na chitarra,
     vi vuogliu arrigalari na canzuna.
         Quannu li corna spuntanu a la luna 
Pinsera iu vulissi spirtusari.
                   
                         Iu cantu e lu me cantu nun è cantu
                              Ca quannu cantu iu fa malu tiempu.                         
                            S’un cantu  la me vista s’annuvrica
                                 lu senziu mi s’aggruppa o si sbiddrica.  

Frase musicale

II
Li gradi su di fierru e fannu cruci,
diavuli diventanu l’amici,
ma iu ca sugnu veru omu di paci
nni dicu beni e lu beni ci luci.

Sutta lu pignu di lu Zaccanieddru
tutti l’amici mi viennu a truvari.
Ci offru ficu, ci offru piruna,
grapiemmu un libbru, nni guarda la luna.

Frase musicale

III
Lu suli c’era, po’ lu scuru vinni.
È tuttu chjaru, finu a li vint’anni:
pinsera stravijati, munnu munnu,
diventanu si unu si li sonna

Stiddri ca vi taliu di luntanu,
furmiculi a lu scuru mi pariti.
Stiddri di n celu ca mi taliati
nun sacciu chi di mia vu’ vuliti.
  
Frase musicale

IV
Buttana di la luna malandrina,
sopiddra chi facissi quannu sduna
lu senziu miu ngruppatu di pinsera,
la fimmina mi sarba e mi dispera.

Attu c'arridu o chianciu senza frenu,
lu zuccaru mi sapi di vilenu;
scuntenti sulu, scuntenti cu tia.
T’allavancassi, sicilincunia

Frase musicale

V
Du gatti ca mi fannu cumpagnia
Mentri la vita beni o mali passa.
Un cani ci abbaià, passà di cursa
La testa ci mancià la peddri e l’ossa.

Tutta chi va santannu  e scuncichìa
la gattareddra mia quannu s’ammuccia.
Lu juocu è chissu di li gatti e cani
Ma chianciu si lu fannu li cristiani.

Frase musicale

VI
Lu vientu m’accarrizza li capiddri
lu nasu anchi la frunti e li masciddri.
Vinni, hiuhiannu, tuttu spinziratu.
Nivuru si nni jì e ntribbulatu

Vulissi spirtusari li pinsera
pi vidiri ntall’aria nzoccu arregna.
Lu suli è tunnu, la luna spirisci,
(recitato): cumpatìtimi la musica chi nesci.


Luna luna luna tu
Suli suli suli tu.
(2 volte, la seconda volta invitando il pubblico)

Vientu vientu hiuhia tu
Hiuhia, un ci pinsari cchiù
(2 volte, la seconda volta invitando il pubblico))


Frase musicale



 Nell'immagine: 
ritratto di Paco De Lucia, dalla bacheca fb del raffinatissimo chitarrista amico mio Antonio Molfetta. 

Nessun commento:

Posta un commento